7 გზა იმისთვის რომ არ ვიყოთ ნერვებმოშლილი დედა

მთელი დღე ბავშვებთან ყოფნა და მათი მოვლა ძალიან რთულია.  თუ ერთზე მეტი შვილი გყავს საქმე კიდევ უფრო რთულდება, რადგან ისინი ჩხუბობენ, კინკლაობენ, არ უთმობენ სათამაშოს შველას კი ორივე თქვენგან ითხოვს.

ასეთ სიტუაციებში ძნელია, გააკონტროლო საკუთარი ემოციები და მრავალჯერადი სიტყვიერი შენიშვნის მიცემის შემდეგ, არ დაიყვირო. ხმამაღალი მოწოდება, ნერვების მოშლა და ბავშვისთვის შეურაცხყოფის მიყენება ყველაზე არასახარბიელო რამეა, რაც კი დედის და შვილის ურთიერთობაში შეიძლება მოხდეს.

გთავაზობთ თავის გაკონტროლების და დაძაბული სიტუაციების გამკლავების 7 გზას:


1. გააცნობიერეთ, რომ თქვენ ვერ გააკონტროლებთ სხვის ქცევას, სამაგიეროდ გააკონტროლებთ საკუთარს. მაგალითად, თქვენ ვერაფრით შეაჩერებთ გაღიზიანებულ ბავშვს, რომელიც მაგიდიდან აიღებს ლარნაკს და თქვენს გასაბრაზებლად იატაკზე დაანარცხებს. სამაგიეროდ, შეგიძლიათ გააკონტროლოთ თქვენი ნერვები, როდესაც მას ამ საქციელის გამო გაუბრაზდებით ან უსაყვედურებთ.

2. ეცადეთ კრიზისებზე არ იფიქროთ. ყოველ წამს ნუ გაიხსენებთ იმ ქცევას და ჩვევებს, რომლითაც თქვენი ბავშვი გაღიზიანებთ. წინასწარ ნუ "დაარიგებთ" და მთელი დღე ნუ უჩიჩინებთ, დღეს მაინც მოიქცეს "კარგად". მართეთ მხოლოდ უშუალოდ ის სიტუაცია, როდესაც ცუდად იქცევა.

3. როდესაც ხედავთ, რომ თქვენი ერთი შვილი მეორეს ურტყამს. ის მეორე ბოლო ხმაზე ყვირის და ცდილობს თავადაც მიაყენოს რამე ზიანი, ასეთ დროს სახლში დიდი აყალ-მაყალი და გაწევ-გამოწევაა. თქვენ "გევალებათ" სიტუაცია მოაგვაროთ, თუმცა ნერვები მშვიდად ლაპარაკის საშუალებას არ გაძლევთ. ამ დროს საჭიროა, უბრალოდ აიღოთ ტაიმ-აუტი. შედით თქვენს ოთახში მარტო, თუნდაც 5 წუთი. დაიმშვიდეთ ნერვები და ისე გადით ბავშვებთან მოსალაპარაკებლად.

4. მოიწესრიგეთ ძილის და კვების რეჟიმი. მართალია რთულია, მაგრამ უნდა ეცადოთ კარგად გამოიძინოთ და ასევე კარგად იკვებოთ. ეს ფიზიკურ სიმხნევეს გაგიზრდით, რაც ბავშვების უკეთ მოვლაში გამოგადგებათ.

5. ივარჯიშეთ. იმ დროს როცა ბავშვებს ჯერ კიდევ სძინავთ, ადექით და ირბინეთ მეგობრებთან ერთად. ეს დღის პოზიტიური დასაწყისი იქნება და კარგი განწყობით დახვდებით ყველა დაბრკოლებას.

6. დაიხმარეთ ვინმე. როდესაც იგრძნობთ, რომ ბავშვებმა მართლა გაგაგიჟეს, თქვენი შესაძლებლობები ამოიწურა და ნერვული სისტემა მეტს ვეღარ გაუძლებს, დაურეკეთ მეუღლეს და სთხოვეთ სამსახურიდან 30 წუთით ადრე დაბრუნდეს. ის, ჯერ ერთი, დაგეხმარებათ ბავშვების დაწყნარებაში, მეორეც, ბავშვების განწყობა შეიცვლება მამიკოს ადრე დაბრუნებულს რომ დაინახავენ.

7. ბავშვების გარეშე შეხვდით ისეთ მეგობრებს, რომლებიც თქვენს დღეში არიან. საერთო "გასაჭირზე" ლაპარაკი ყოველთვის ამართლებს. მათთვის გაზიარებულ "დამქანცველ" ისტორიებს შეხედეთ იუმორით. იხალისეთ მათ მონათხრობზე. შეიძლება ისეც აღმოჩნდეს, რომ მათი შვილები თქვენს შვილებზე უფრო "ენერგოვამპირები" არიან.