როგორ ვამეცადინოთ ბავშვები ზაფხულში?

დატვირთული სასწავლო წლისა და დამღლელი მეცადინეობის შემდეგ, ზაფხულის არდადებზე ხშირად ისე ხდება, რომ ბავშვებს სკოლაში გავლილი მასალა სანახევროდ ავიწყდებათ.

განსაკუთრებით დაწყებითი სკოლის მოსწავლეებს ზაფხულის განმავლობაში აღარც ახალი ნასწავლი თვლა ახსოვთ, აღარც ანგარიში და აღარც წერა-კითხვა.


მსოფლიო სტატისტიკის მიხედვით, ბავშვები ზაფხულის ბოლოს 30-40%-ით უარესად წერენ იმ ტესტს, რომელიც სასწავლო წლის ბოლოს უკვე დაწერეს. ეს კი იმას ნიშნავს, რომ არდადეგების განმავლობაში ნასწავლი მასალის თითქმის ნახევარი დაავიწყდათ.

ეს რომ ასე არ მოხდეს და ბოლო წლების სტატისტიკა რომ შეიცვალოს, საჭიროა ზაფხულში მეცადინეობა.

მეცადინეობის დრო, ადგილი ან სულაც სტილი რა თქმა უნდა შეგიძლიათ თავად გამოიგონოთ ან შეარჩიოთ, მაგრამ ჩვენ შემოგთავაზებთ ერთ-ერთ მარტივ და ეფექტიან გზას, რომელიც ნამდვილად კარგ შედეგებს მოგცემთ.

სქემა ასეთია:

• ბავშვი დღის განმავლობაში მეცადინეობს მხოლოდ1,5 საათის განმავლობაში;
• აქედან 30 წუთის განმავლობაში ის მეცადინეობს დედასთან ერთად;
• 30 წუთის განმავლობაში - კომპიუტერის გამოყენებით;
• და კიდევ 30 წუთის განმავლობაში - დამოუკიდებლად.

პირველი 30 წუთი გამოიყენეთ მაქსიმალურად, რომ ენთუზიაზმით ჩაერთოს დავალებაში. დაეხმარეთ მას სხვადასხვა ვიზუალური საშუალებებით. მაგ: ფერად ბარათებზე დაუწერეთ მაგალითები ან ასოები; ასევე შეგიძლიათ ფერადი ჩხირების საშუალებით იანგარიშოთ.

მეორე 30 წუთის განმავლობაში ჩაურთეთ კომპიუტერი და შესთავაზეთ წინასწარ შერჩეული სავარჯიშო-თამაში, რომელშიც წერაც საჭირო იქნება და თვლა-ანგარიშიც. განუსაზღვრეთ კონკრეტული დრო და 30 წუთზე მეტი ხნის განმავლობაში თამაშის საშუალება არ მისცეთ.

ბოლო 30 წუთი კი, აცადეთ, თავად გამოიყენოს. მიეცით სამუშაო რვეული და წინასწარ მოუნიშნეთ დავალებები (დღეს გააკეთებ აქედან-აქამდე). ნახევარი საათის ბოლოს კი მიდით და შეამოწმეთ რამდენად კარგად გაართვა თავი დავალებას. 

დღეში საათნახევრიანი მეცადინეობა თქვენთვის მისაღებ შედეგს ნამდვილად გამოიღებს. დარჩენილი დრო კი შეგიძლიათ ერთად ხმამაღლა იკითხოთ დამატებითი მხატვრული ლიტერატურა, გაისეირნოთ ველოსიპედით, ან სულაც წამოწვეთ და კარგ ფილმს უყუროთ.